سنڌ ۾ پاڻيءَ جي کوٽ خطرناڪ صورتحال اختيار ڪري ورتي،مظاهرا، ڌرڻا، درياءَ تي دعائون

ڪراچي(م ڊ): سنڌ ۾ پاڻيءَ جي کوٽ خطرناڪ صورتحال اختيار ڪري ورتي، سنڌو ۾ پاڻيءَ جي کوٽ 60 سيڪڙو تائين پهتي آھي، ڪوٽڙي ڊائون اسٽريم ۾ واري اڏامڻ لڳي، 1991 واري پاڻي معاهدي تحت مئي جي مهيني ۾ ڪوٽڙي بيراج وٽ 15 هزار ڪيوسڪ پاڻي موجود هئڻ گهرجي  هن وقت ڪوٽڙي بيراج ۾ رڳو 200 ڪيوسڪ پاڻي ڇڏيو پيو وڃي، حيدرآباد، ٺٽي، سجاول ۽ بدين سميت مختلف علائقن ۾ بيٺل فصلن ۽ ڪپهه کي ڪاپاري ڌڪ لڳڻ جو خدشو آھي، سانگهڙ ۾ پاڻيءَ جي کوٽ 50 کان 60 سيڪڙو ۽ پڇڙيءَ جي شاخن ۾ کوٽ 80 سيڪڙو تائين وڃي پهتي سنڌ ۾ پاڻيءَ جي بدترين کوٽ خلاف چوٿين ڏينهن به آبادگار ۽ سياسي سماجي تنظيمون سراپا احتجاج بڻيل آهن، سڪرنڊ، سن، فيض گنج، ڪرونڊي ۽ ٻٻرلوءِ ۾ آبادگارن پاڻي کوٽ خلاف احتجاجي مظاهرا ڪري ڌرڻا هنيا جهڏو ۾ آبادگارن ۽ سياسي سماجي تنظيمن ريلي ڪڍي، ڪرونڊي ۾ ڌرڻي دوران هڪ آبادگار پاڻ تي پئٽرل هاري باهه ڏيڻ جي ڪوشش ڪئي ته ماڻهن کيس روڪي ورتو مظاهرين جو چوڻ آهي ته سنڌ ۾ پاڻيءَ جي هٿرادو کوٽ پيدا ڪري زراعت تباهه ڪئي پئي وڃي، سکر ۾ آبادگارن جو وفاقي وزير خورشيد شاهه جي گهر آڏو به احتجاج ڪيو ويو ٻئي پاسي سنڌ ۾ پاڻيءَ کوٽ خلاف تحريڪ انصاف جا ڪارڪن به روڊن تي نڪري آيا آهن، جن سکر بيراج وٽ ڌرڻو هنيو آهي پي ٽي آءِ اڳواڻن الزام هڻندي چيو ته سنڌ ۾ رڳو بااثر ۽ حڪومتي ماڻهن کي پاڻي ملي رهيو آهي، پڇڙيءَ جي آبادگارن کي نظر انداز ڪيو پيو وڃي  سکر ۾ عورتن پاران درياهه کي گلن جي ڀيٽا پيش ڪندي پاڻيءَ جي کوٽ جي خاتمي لاءِ دعائون به گهريون ويون